Alus lan Keras

Waosan : Markus 9 : 38 – 40
Pamuji KPK 329 : 1, 3
Nats : “Sapa sing ora nglawan kita, kuwi nyarujuki.” [ayat 40]

Umumipun tiyang menika alus lan sabar dhateng dhirinipun piyambak, nanging keras dhateng tiyang sanes, langkung-langkung dhateng anak lan semah. Tiyang gampil toleran dhateng dhirinipun (kalepatanipun) piyambak, nanging gampil ngakimi dhateng kalepatanipun tiyang sanes.

Perangan ingkang kita waos menika wonten gandheng cenengipun kaliyan perangan candhakipun (ay. 43-50). Perangan menika ngrembag bab bebahan supados sami ambek paramarta (alus) lan sabar, paring pitedah bab kadospundi kedahipun sikaping para murid dhateng tiyang sanes. Dene perangan candhakipun paring pitedah kados pundi kedahipun sikaping para murid dhateng dhirinipun piyambak. Dhateng tiyang sanes para murid kedah ambek paramarta lan sabar. Dhateng dhirinipun piyambak kedah keras, disiplin.

Tiyang ingkang nundhung setan ing ayat 38 estu-estu lan kasil, benten kaliyan ing Para Rasul 19:13-16, senadyan caranipun klentu. Tumraping Gusti Yesus saben pakaryan ingkang murugaken gesang binarkahan lan kaluwaran saking pangwasanipun pepetang, boten perlu dipun awisi, boten perlu dipun alang-alangi. Para murid kedah nggadhahi sikap toleran, sampun ngantos kosokwangsulipun. Ayat 40 kedah kacundhukaken kaliyan Mat. 12:30. Ayat-ayat menika boten lelawanan ananging malah sami njangkepi setunggal lan setunggalipun. Ayat 40 ngatur sikaping greja tumraping tiyang-tiyang sajawinipun greja, dene Mat. 12:30 kedah dados peranganing pawartos ingkang kedah kawartosaken dhateng tiyang-tiyang ing salabeting greja lan ugi ing sajawining greja. Sikap netral dhateng Sang Kristus, ateges nglawan Sang Kristus. Waosan menika paring piwucal dhateng kita:

•   Sampun ngantos gampil ngakimi dhateng tiyang sanes.
•   Kedah kanthi wicaksana mapanaken gesang kita ing satengahing masyarakat.
•   Saben tumindak/ pakaryan ingkang murugaken gesang binarkahan lan kaluwaran saking piala, angger motivasinipun leres, kedah kita sengkuyung. Amin. [SS]

“Sing alus marang wong liya, ning sing keras marang awakmu dhewe!”