Waosan : Wahyu 12 : 1 12
Nats : Ayat 12
Pamuji: KPK 141
Nats : Ayat 12
Pamuji: KPK 141
Wiwit manungsa dhumawah ing dosa, manungsa gesangipun dipun
kwasani dening iblis (Yun: diabolos, Ibrani: Satan), ingkang nggadhahi teges:
”tukang fitnah”, nasaraken tiyang sajagad. Ing waosan kita kagambaraken naga,
ingkang badhe memangsa Putra ingkang miyos saking wanita.
Ing sauruting gesang tansah wonten memengsahan ing antawisipun
Sang Mikael (malaekat ingkang ngayomi umatipun Allah Dan 1:12) kaliyan naga
ingkang kabantu dening para malaekatipun. Ananging naga (iblis/setan) mboten
kuwagang nglawan, wasana kasoran. Pirantos ingkang ngawonaken/ ngasoraken naga
kalawau inggih punika panebusanipun Sang Kristus. Umat kagunganipun Gusti ugi
ndherek ngraosaken panebusan punika srana nyekseni pangwasanipun Gusti Allah
ingkang milujengaken gesangipun. Naga ingkang katelukaken dening Mikael dados
gegambaran iblis ingkang dipun telukaken dening Gusti Yesus, ingkang murugaken
para umat kagunganipun nampi “kemenangan”.
Kebabaring Kratonipun Allah ingkang kawiwitan srana panebusan
ing kajeng salib, cunduk kaliyan piwucalipun Yokanan lan Paulus, bilih seda lan
wungunipun Gusti Yesus dados pratandha bilih iblis sampun kakawonaken lan
madeging kratonipun Allah kanthi sedaya berkah-berkahipun. Iblis/setan mboten
saged malih nindakaken fungsinipun, karana Gusti Yesus sampun unggul ing yuda,
kamardikan, katentreman lan kawilujengan kaparingaken dhateng para umatipun
kanthi lelahanan (gratis).
Gesang ing pangwasanipun iblis murugaken kita sami nandhang
sangsara, nandhang cilaka, kagantungan ing karisakan lan pati. Ananging panebusanipun
Sang Kristus murugaken kita sami nampeni lan ngalami karahayon ingkang
langgeng. Sami bebingaha! Tansah bebingaha ing sadhengah kawontenan! Kabingahan
kita saben wekdal lan ing sadhengah kawontenan dados paseksi dhateng tiyang
sanes, nedahaken agunging sih katresnan lan pakaryanipun Gusti. Amin [SS]
“Kabungahan kan tan kendhat dadi
pratandha tumrahing sihe Gusti kang lumintu.”
Tidak ada komentar:
Posting Komentar