Waosan : Efesus 3 : 2 – 6 | Pamuji : KPK 192
Nats: “Kowe
rak wis padha krungu mungguh ayahaning sih-ramate Gusti Allah, kang
kapitayakake marang aku marga saka kowe kabeh” [ayat 2]
Ujian Nasional kangge siswa klas 3 SMP lan klas 3 SMA asring
ndadosaken “momok”, ajrih. Boten namung siswanipun, nanging ugi lembaga
sekolahipun. Mila, wonten pangupaya ingkang dipun tindakaken. Ing sekolah
katindakaken doa, istighosah, try-out, malah ugi wonten ingkang pados bocoran
soal lan kunci jawaban. Ujian ingkang mesthinipun asipat rahasia malik dados
boten rahasia. Umumipun, siswa ingkang angsal bocoran soal utawi kunci jawaban
punika kraos remen sanget. Ingkang wadi sampun kabukak.
Seratanipun Paulus ing dinten punika paring piwucal: Sepisan,
Paulus sadhar kathah tiyang ingkang dereng mirengaken kabar bingah wewadi
saking Sang Kristus punika. Krana punika, Paulus wekel anggenipun martosaken
dhateng tiyang sanes, mliginipun tiyang sanes Yahudi. Menawi mekaten, kita
minangka tiyang ingkang sampun nampeni kanugrahanipun Sang Kristus kedahipun
ngrumaosi bilih bab punika boten kita agem kangge gesang kita piyambak,
ananging ugi kangge tiyang-tiyang sakiwa tengen kita ingkang mbetahaken
kanugrahanipun Gusti.
Kaping kalih, Paulus nggadhahi kekendelan sowan dhateng Gusti
Allah, awit Gusti Allah ingkang langkung rumiyin nampeni kita kanthi
ngawontenaken bedhamen ing dalem Sang Kristus. Wewadinipun Sang Kristus dados
jaminan kangge kita bilih ing kamirahanipun, Gusti Allah tansah nampeni kita
ingkang sowan Panjenenganipun. Kadosa pundi petenging gesang kita,
Panjenenganipun tetep setya tuhu nampeni gesang kita.
Kaping tiga, Paulus boten mangu-mangu nalika pangundhanging
Injilipun Allah punika katampik dening tiyang-tiyang ingkang boten purun
pitados. Malah nalika wonten ing salebeting pakunjaran, babar pisan Paulus
boten mangu-mangu. Paulus pitados dhateng Sang Kristus lan sedaya pakaryanipun
Gusti Yesus Kristus.
Tumrap ingkang pracaya Gusti Yesus, kita boten badhe tahan
nyimpen wadinipun Sang Kristus, nanging terus kita undhangaken ing saranduning
gesang kita sadinten-dinten. [Pong]
“Gesanging tyang
pracaya lir buku ingkang tinarbuka, murih tiyang sanes saged maos lan
mangertos Sang Kristus.”
Tidak ada komentar:
Posting Komentar