Bacaan : Mateus 10 : 17 – 22 | Pamuji : KPK 125
Nats: “Wong
kabèh bakal padha sengit marang kowé merga saka Aku. Nanging sing sapa mantep
tekan wekasan, bakal slamet.” [ayat
22]
Ing satunggaling lomba maraton (lari jarak jauh) utawi lomba
sepeda pancal mbetahaken ketahanan ingkang ageng. Lomba menika mboten namung
mbetahaken semangat ing wiwitan. Yen mboten saged etang-etang tanggoning
raganipun saged mupus ing tengahing margi saderengipun dumugi ing finish
(pungkasan). Menawi manggihi unggah-unggahan (tanjakan) katambahan bentering
surya, karaos rekaos sanget, lajeng saged mupus ing tengahing margi.
Rekaosing gesang: pakewed, kasangsaran, kacingkrangan, was
sumelang, ajrih lsp, saged lan malah gampil ndamel iman kapitadosan dados
nglokro, mboten mantep. Kamangka lampahing gesang ing alam donya menika
wekdalipun dangu sanget, mataun-taun lan mawindu-windu, menapa malih yen kathah
pakewed lan kasangsaran ingkang dipun alami, kraos saya dangu malih. Sekecaning
gesang kemawon saged ndamel kecalan kapitadosan, menapa malih rekaosing gesang,
mesthi gampil sanget ndamel gingsiring iman.
Para pendherekipun Gusti Yesus mesthi badhe ngalami rekaosing
gesang. Gusti Yesus ingkang pirsa bab menika, tumunten paring pepiling supados
tansah waspada murih manteping kapitadosanipun. Para sekabat kadhawuhan supados
mboten ajrih lan sumelang kados pundi ngalami pakewed lan kasangsaran menika.
Gusti Yesus ngyakinaken bilih Rohipun Sang Rama mesthi mitulungi sanalika
menika. Kang kaping tiga, Gusti Yesus ngengetaken bilih anteping kapitadosan
kabetahaken ngantos tutuging lampahing gesang, ngantos pungkasan.
Kita sedaya ugi saged ugi ngalami rekaosing gesang, utawi
bokmenawi samangke saweg ngalami gesang ingkang makaten, kita prelu ngantepi
kapitadosan kita. Ingkang menika, saben dinten kita prelu tansah sesambetan
kaliyan Gusti ingkang dados pikekahing kapitadosan kita. Kita yakini bilih
Gusti Allah Rama kita ingkang mahaasih mesthi paring pitulungan dhateng kita.
Ewasamanten, kita ugi kedah tansah waspada. [ST]
“Waspada menika saged
etang-etang bebaya lan kakiyatan.”
Tidak ada komentar:
Posting Komentar